جارقىن جەڭىس. ەل بولىپ ماقتانار مەرەيلى مەزەت, ۇلت بولىپ ۇلىقتالار تاريحي ءسات. ماراپاتتاۋ سالتاناتىنا سامالدىڭ ويۋ-ورنەكتى ۇلتتىق كيىممەن شىققان ءساتىنىڭ ءوزى مۇقىم قازاقتىڭ التى قۇرلىققا مارتەبەلى اتىن شىعارىپ, قازاق رۋحانياتىنىڭ كوكجيەگىن كەڭگە جايدى.
تۋىندى شەتەلدىكى بولعانمەن, تۋما تالانت قازاق توپىراعىنىڭ تۇلەگى. ورتاق ولجاعا ورىس حالقىنان ارتىق قۋانباساق, كەم قۋانبايتىنىمىز انىق. «سەرگەي, ساعان كوپ راقمەت. بۇل زور قۇرمەت», دەدى سامال جۇلدە تۇعىرىندا تۇرىپ.
«ايكا» الەۋمەتتىك دراماسى قىرعىزستاننان كەلگەن قىز جايىندا وربىگەن. كەيىپكەر ماسكەۋدە بوسانىپ, بالاسىن پەرزەنتحاناعا تاستاۋعا ءماجبۇر بولادى, كارتينادا سول قىزدىڭ انالىق سەزىمى مەن قايعى-مۇڭى سۋرەتتەلەدى. فيلم بەس كومپانيانىڭ قولداۋىمەن تۇسىرىلگەن, اتاپ ايتار بولساق «كينودۆور» اتتى سەرگەي دۆورتسەۆويدىڭ ستۋدياسى, سونىمەن قاتار گەرمانيانىڭ, پولشانىڭ, قىتايدىڭ, قازاقستاننىڭ كومپانيالارى. بۇعان دەيىن ول «تيۋلپان» فيلمىندە باستى ءرولدى سومداعان. ول تۋىندى 2008 جىلى كانندا «ەرەكشە كوزقاراس» كونكۋرسىنىڭ باس جۇلدەسىن, جاس ادىلقازىلاردىڭ جۇلدەسىن, سونىمەن قاتار فرانتسيانىڭ ءبىلىم مينيسترلىگىنىڭ جۇلدەسىن جەڭىپ العان بولاتىن. قازاقستاندىق اكتريسا سامال ەسلياموۆا اتالعان كارتينادا جۇمىس ىستەگەن ۋاقىتتا ءوزىنىڭ ەشقانداي ناگرادالار تۋرالى ويلاماعاندىعىن ايتادى. ء«سىزدى سۋرەتكە تۇسىرگەندە, رەجيسسەر ونى قالاي جوسپارلاعانىن ءبىلۋ وتە ماڭىزدى. بۇل تاجىريبە ءبىزدىڭ باستى ماقساتىمىز, ول شىعارماشىلىق ۇجىمنىڭ العا باسۋىنا كوپ كومەكتەستى», دەيدى قاراگوز قارىنداسىمىز.
اكتريسانىڭ قىسقاشا ءومىربايانىنا كەلەر بولساق, جەڭىمپاز جەرلەسىمىز 1984 جىلى 1 قىركۇيەكتە دۇنيەگە كەلگەن. 2011 جىلى رەسەيدىڭ تەاتر ونەرى ينستيتۋتىن (گيتيس) بىتىرگەن. اكتريسانىڭ اناسى گۇلمايرا مەن اكەسى ءىلياس سولتۇستىك قازاقستان وبلىسىنىڭ اققايىڭ اۋدانىنداعى ارالاعاش اۋىلىندا تۋعان.
اكتريسانىڭ اپكەسى اياگوز ساتينا بولسا, سامالدىڭ 2004 جىلدان بەرى ماسكەۋدە تۇرىپ جاتقانىن ايتادى. «سامال اتا-اناسىنا ءجيى كەلىپ تۇرادى. ەندى اتى الەمگە ايگىلى اكتريسانى ونىڭ اكەسى مەن شەشەسى جاز ايىندا كەلەدى دەپ كۇتىپ وتىر», دەيدى ول.
كانن كينوفەستيۆالى 8-19 مامىر ارالىعىندا ءوتتى. نەگىزگى فەستيۆال 21 فيلم اراسىندا وتكىزىلدى. اتالعان جۇلدە تۇعىرىنا جەرلەسىمىزدىڭ كوتەرىلۋى بولاشاق جاستاردى ىنتالاندىرىپ, وتاندىق كينونىڭ قارىشتاپ دامۋىنا ىقپال ەتەرى انىق.
ايتا كەتەيىك, نەگىزگى باس جۇلدەنى قازىلار القاسى «دۇكەن ۇرلىقشىسى» ءفيلمىن تۇسىرگەن جاپون رەجيسسەرى حيروكادزە كورەەداعا بەردى. كانن فەستيۆالىنىڭ قازىلار القاسى سامال ەسلياموۆامەن بىرگە يتاليالىق مارچەللو فونتقا «دوگمان» كارتيناسى ءۇشىن ەڭ ۇزدىك ەر ادام ءرولىن بەردى. روك-مۋزىكانت ۆيكتور تسوي تاعدىرىنا ارنالعان كيريلل سەرەبرەننيكوۆتىڭ «جاز» ءفيلمى ەڭ ۇزدىك ساۋندترەك جۇلدەسىنە قول جەتكىزدى.
ميراس اسان,
«ەگەمەن قازاقستان»
